2Ch 13 | NdeIBE | STEP | Ngomnyaka wetshumi laficamibili wokubusa kukaJerobhowami, u-Abhija waba yinkosi yakoJuda,

2 Chronicles 13

U-Abhija Ubusa KoJuda

1 Ngomnyaka wetshumi laficamibili wokubusa kukaJerobhowami, u-Abhija waba yinkosi yakoJuda, 2 njalo wabusa eJerusalema okweminyaka emithathu. Ibizo likanina lalinguMahakha, indodakazi ka-Uriyeli waseGibheya. Kwaba lempi phakathi kuka-Abhija loJerobhowami. 3 Yathi idibana ekulweni u-Abhija wayelamadoda aqinileyo ayizinkulungwane ezingamakhulu amane, kanti uJerobhowami wadibana laye elamadoda ayizinkulungwane ezificamibili.

4 U-Abhija wema phezu kweNtaba iZemarayimi, elizweni lamaqaqa lako-Efrayimi, wathi: “Wena Jerobhowami kanye laye wonke u-Israyeli, lalelani kimi, lizwe! 5 Alikwazi na ukuthi uJehova, uNkulunkulu ka-Israyeli, unikele ubukhosi bako-Israyeli kuDavida lenzalo yakhe kuze kube nininini ngesivumelwano setshwayi na? 6 Kukanti uJerobhowami indodana kaNebathi, isikhulu sikaSolomoni indodana kaDavida, uhlamukele inkosi yakhe. 7 Abantu ababi bamlandela behlamukela uRehobhowami indodana kaSolomoni esesemncinyane engakaqedisisi njalo engakabi lamandla okumelana labo.

8 “Khathesi licabanga ukumelana lombuso kaJehova uNkulunkulu, ophethwe ngamadodana kaDavida ngoba libona libanengi kakhulu, lilamathole eGolide elawenzelwa nguJerobhowami ukuba abe ngonkulunkulu.

9 Kalibaxotshanga yini abaphristi bakaJehova uNkulunkulu, amadodana ka-Aroni, kanye labaLevi, lazibekela abenu abaphristi njengalokhu okwenziwa ngabantu bamanye amazwe na? Kuthi lowo ofika elenkunzi loba izinqama eziyisikhombisa ukuba ahlukaniselwe uJehova waba ngumphristi walokho okungayisikho onkulunkulu.

10 “Kodwa thina, uJehova uNkulunkulu ngowethu, asimdelanga. Thina abaphristi esilabo ngamadodana ka-Aroni, amkhonzayo uJehova, njalo baphathiswa ngabaLevi.

11 Bayanikela kuJehova ekuseni lantambama izinsuku zonke iminikelo yokutshiswa lempepha elephunga elihle. Bayalungisa izinkwa ezahlukaniselwe uJehova etafuleni legolide elihle, balumathise izibane oluthini lwegolide ntambama nsuku zonke. Thina siyawulalela umlayo kaJehova uNkulunkulu. Kodwa lina limdelile. 12 UNkulunkulu ulathi, nguye osikhokhelayo. Abaphristi bakhe abaphethe amacilongo bazawavuthela besimema ekulweni lani. Madoda ako-Israyeli, lingabokulwa loJehova uNkulunkulu wabokhokho benu, ngoba aliyikuphumelela.”

13 UJerobhowami wayesethumele elinye iviyo lamabutho akhe ngemva ukuze athi yena ejamelane labakoJuda phambili lona licathamele ngemuva kwabo. 14 AbakoJuda bafulathela kodwa babona ukuthi babehlaselwa nxa zonke phambili langemuva kwabo. Bakhala kuJehova. Abaphristi bevuthela amacilongo abo 15 kwathi abakoJuda bakhwaza ngephimbo lokuhlasela empini. Kuthe kuzwakala ukukhwaza ngephimbo lokuhlasela, uNkulunkulu wabhuqa uJerobhowami labo bonke abako-Israyeli phambi kuka-Abhija labakoJuda. 16 Abako-Israyeli babalekela abakoJuda njalo uNkulunkulu wabanikela ezandleni zabo. 17 U-Abhija lamabutho akhe babulala amadoda amanengi kakhulu, kwafa amadoda ako-Israyeli aqinileyo empini ayizinkulungwane ezingamatshumi amahlanu.

18 Amadoda ako-Israyeli aqinileyo ngalesosikhathi anqotshwa, kwathi abakoJuda baphumelela ngoba babethembile kuJehova uNkulunkulu waboyise.

19 U-Abhija waxotshana loJerobhowami wamthathela amadolobho eBhetheli, leleJeshana kanye lele-Efroni, lemizi eyayiseduzane khonapho. 20 UJerobhowami kazange abuse futhi kusabusa u-Abhija. UJehova wamtshaya wafa.

21 Kodwa u-Abhija waqina waba lamandla embusweni. Wathatha abafazi abalitshumi lane waba lamadodana angamatshumi amabili lamadodakazi alitshumi lesithupha.

22 Ezinye izehlakalo ekubuseni kuka-Abhija, akwenzayo lakutshoyo, kulotshiwe ezindabeni zomphrofethi u-Ido.